MESHKUJT PERTOJNE T'I PASTROJNE DUART....

Kështu së paku është në Amerikë. Dallimi në mes gjinive është bërë edhe më i madh. Hulumtimi i ri amerikan tregon se 1/3 e meshkujve nuk i pastrojnë duart pasi shkojnë në tualet. Lënia e tillë pas dore e higjienës personale mund të gjendet vetëm te 12% e grave, tregojnë hulumtuesit, të cilët kanë spiunuar në tualetet publike. Mirëpo, para dy vitesh, kur është kryer një hulumtim i ngjashëm, vetëm 1/4 e meshkujve nuk i pastronin duart. Edhe numri i femrave të papastra ishte më i vogël, vetëm 10%.
“Meshkujt do të duhej të ndalonin tek lavamani”, thotë Brian Sansoni zëdhënës i shoqatës së prodhuesve të sapunit dhe një nga sponsorët e hulumtimit. Në studimin e ri të kryer gjatë muajit gusht të këtij viti janë përfshirë 6 000 persona në katër qytetet më të mëdha amerikane. Doktorët përmendin rëndësinë e pastrimit të duarve pas tualetit, pas numërimit të parave apo pas vozitjes në transportin publik.
Në fakt, pastrimi i rregullt i duarve është preventive e shkëlqyeshme ndaj sëmundjeve si, ftohja apo gripi. Eshtë interesant fakti se në studimin e mëhershëm që ishte bazuar në anketë, 82% e amerikanëve kanë thënë se pas përdorimit të tualetit gjithmonë i pastrojnë duart. Mirëpo, hulumtuesit e shoqatës amerikane të mikrobiologëve kanë dëshmuar se këtë e bëjnë vetëm 77% e njerëzve.