Apple paraqet zyrtarisht laptopet e ri MacBook Pro

Rreth secilës paraqitje të produkteve të reja nga kompania Apple çohet pluhur i madh, mirëpo kjo nuk nënkupton se Apple në të vërtetë do të shfaq diçka spektakolare. Kjo nuk ka ndodhur as kësaj radhe, kur janë paraqitur laptopët e rinj MacBook Pro.

Shkurtimisht, ajo që Apple ka treguar të martën në mbrëmje është një kozmetikë e lehtë e serisë ekzistuese të MacBook Pro dhe asgjë më tepër. Është e vërtetë se, MacBook Pro i ri me diagonale të ekranit prej 15.4 inçësh tani ka kornizë të zezë rreth ekranit, TouchPad i ri nuk ka buton shtesë, por i tëri funksionon si një buton i madh dhe shtëpizë alumini e përpunuar nga një pjesë e vetme e aluminit.

Pro është i trashë gjithsej 2.41 centimetra, i rëndë 2.49 kilogramë, që është diç më shumë nga seria e kaluar.

Sa i përket brendësisë, në të gjendet kartela e re grafike 9600M GT nga NVIDIA, e cila ende është më e fuqishmja që mund të blihet në treg, derisa gjërat tjera janë pak a shumë standarde dhe shumë të ngjashme me versionet e mëhershme: procesor nga Intel Core 2 Duo i cili punon me takt 2.4 GHz apo 2.6 GHz, dy apo katër GB DDR3 RAM memorie dhe kartelë grafike shtesë e integruar në pllakën amë të laptopit.