BMW konfirmon prodhimin e serisë hibride 3

Drejtori ekzekutiv i BMW-së Norbert Reithofer ka paralajmëruar lansimin e serisë hibride 3 pak kohë pas fillimit të shitjes së serisë hibride 5.
Në takimin e aksionarëve të BMW-së Reithofer ka thënë se arsyeja e përshpejtimit të teknologjisë hibride, pos rregullave çdo ditë e më të ashpra ekologjike, është edhe në kërkesën e madhe për këtë lloj të automjeteve në Japoni.

“Shitja e automjeteve hibride atje (në Japoni) ka eksploduar. Nëse nuk keni model hibrid në portfolio, gjasat janë shumë të mëdha që së shpejti atje të mos shisni asnjë automjet”, u ka thënë Reithofer aksionarëve të tubuar.

Drejtori i BMW-së ka paralajmëruar fillimin e shitjes së serisë hibride 5 qysh në fillim të vitit të ardhshëm, e teknologjinë e njëjtë BMW planifikon ta kopjojë edhe në modelet tjera, para së gjithash në serinë 3 e cila është edhe më e shitura e BMW-së deri më tani.