Nokia e re per adhuruesit e muzikes

Nga punëtoria e gjigantit finlandez të telefonisë mobile na vjen një celular shumë interesant pa tastierë dhe me ekran të madh të ndjeshëm në prekje.

Nokia 5800 XpressMusic është diçka që më afërmi do të mund ta quanim ‘vrasës’ i iPhone, e që vjen nga tabori i Nokias.

Bëhet fjalë për një telefon të mençur (smartphone) i cili fizikisht është i ngjashëm me iPhone me ekran të madh 3.2 inçësh dhe rezolucion prej 640×360 pikselash. Në të gjendet edhe kamera me auto-fokus, me blic të dyfishtë LED, rezolucion prej 3.2 megapikselash dhe optikë të Carl Zeiss.

Sa u përket lidhjeve, në të gjenden HSDPA e WiFi si dhe qasja 3.5 milimetërshe, derisa memoria mund të zgjerohet deri në 16 GB microSD me anë të kartelave të memories.

Që të mos mbetet me asgjë prapa pajisjes së kompanisë Apple, Nokia ia ka shtuar modelit 5800 edhe GPS-në. Ajo çfarë na intereson është se sa mirë do të punojë në platformën Symbian S60 5th Edition, sepse e dimë që aty iPhone është më i forti.

Nokia 5800 XpressMusic do të duhej të paraqitej në treg në fillim të vitit të ardhshëm me çmim tani për tani të panjohur.